حنين طارق - رقص

بدأت أتمرن رقص ابتداءً من عمر ٧ سنين.. فضل معايا وفضلت اتمرن أنواع مختلفة باليه، تاب، هيب هوب بجانب اكتشافاتي الخاصة في الحركة على مر سنين المراهقه وعند سن ال٢٠ لاحظت التزامي ليه وتفكيري بيه كجزء من حياتي بيزيد. هو الوسيلة الصادقة الوحيدة اللي بعرف اعبر فيها لذاتي. من أكتر الحاجات اللي بتحركني هي المزيكا، بحب أخبز، وأكتب، وألعب بالاقمشة لخلق منهم هدوم او شنط او اي حاجة.

نوّار سالم - رقص

مرحبا أنا نوّار، عمري ٢٥ سنة ومن فلسطين، بحب أرقص ، واسمع موسيقى، وبحب الاكل والتلفزيون كتير. بديت أرقص من وأنا صغيرة في فرقة سرية رام الله الأولى دبكة، ومن ٦ سنين بديت ارقص رقص معاصر، درست لستة شهور في أكاديمية روما للرقص، وشاركت في عروض مختلفة في الدبكة والرقص المعاصر. وكمان اللي ٤ سنين بدرب رقص معاصر ودبكة في مدرسة الرقص في سرية رام الله الأولى للأطفال من عمر ٩-١٤ سنة

إسلام علي - صنّاع

اسمي اسلام ، مدرب مع أضف من 2017 في مجال البرمجة والإلكترونيات ، مهتم بالتقنية خصوصاً التصنيع الرقمي و دمج ما هو رقمي في البيئة المحيطة بينا ، دربت في اكتر من مؤسسة و دربت مع Udacity ، ومتحمس جداً أقابلكم ونلعب و نكتشف ونتعلم مع بعض .

دميانة عصام - صنّاع

طالبة بكلية الحاسبات مهتمة بالبرمجة الإبداعية والمعلوماتية. قامت دميانة بتدريب ورش حوسبة في مدارس أضف بجمعية رواد التنمية كما شاركت بإقامات دُم تِك لتوفير الدعم التقني للمشاريع الحركية.

حسام شكرالله - برمجة إبداعية

بشتغل مع أضف في المعسكرات من 2011. دربت فنون ودربت برمجة. بحب اللعب في تصميم وبرمجة الألعاب وأي حرف يدوية، مثل النجارة والحدادة والخياطة والجلد. حاليا بشتغل على تصميم دروع واسلحة ودعائم رقمية واطبعهم واسنفرهم والونهم..الخ..حتى الوصول للنتيجة النهائية. بحب اشتغل في المؤثرات الخاصة للأفلام والمسرح. اي حاجة بعملها بحب انني احاول ادمج الشغل الرقمي مع الغير رقمي.

عايدة عويضي - برمجة إبداعية

انا فنانة بصرية بشتغل بوسائط متعددة. طول عمري بحب ارسم و مهتمة بالفنون و التحريك لكن انجذبت في ٢٠١٩ للفنون الرقمية و من قريب للبرمجة الإبداعية. بحب دايما اتعلم تقنيات جديدة. أعمل كمصممة جرافيك من ٢.١٨ و كنت ميسرة ورش للفنون في ٢٠١٨ و ٢٠١٩ في انجلترا. انا كنت مُعَسّكرة في معسكرات أضف في ٢٠١٢ و ٢٠١٣ و متحمسة ابقي مدربة في المعسكر السنة دي!

هنا الرخاوي - فنون بصرية

اسمي هنا الرخاوي بشتغل مساعد مخرج و بحب اعمل تريكو بالخيوط و اعمل سلطات بحب كمان ارسم و انحت و مهتمة بالمؤثرات الخاصة من دم و جروح و شعر مستعار. اول مرة اشارك في معسكرات اضف و متحمسة جدا اشارك معاكم في الفنون البصرية

زياد طارق - فنون بصرية

اسمي زياد.. انا في الاساس مصور وبشتغل بوسائط متعددة في الفنون البصرية.. بعد ما درست اعلام لفترة، تخليت عن الدراسة في الجامعة واشتغلت في الافلام وفي التصوير الصحفي وعملت قصص مصورة.. كمان شاركت في فرقة عرايس، كنت بصنع في الاول وبعدين اتعلمت وعرضت الاراجوز.. بعدها رجعت لدراسة الفنون البصرية وخلصت.. بحب فنون الشارع والشغل في المساحات العامة.. بحب النحت والرسم والتحميض والكولاج وبحب أشتغل بايديا

عمر كيال - صوت

ابتديت اتعلم جيتار من 2009 و من ساعتها حياتي اتغيرت و دخلت ورش تصوير ومسرح بعد كدة و بعدين بدت إنتاج أموسيقي و تصميم صوت . بحب اتعلم حاجات جديدة طول الوقت من أول الكروشية لحد البرمجة . تجربة مدارس أضف الصيفية غيرت نظرتي لعملية التعلم و كل سنة بتعلم حاجات جديدة من المتدربين

زهراء يعقوب - صوت

باحثة في التراث والحضارة النوبية. محبة للمسرح والسينما والتمثيل وشاركت بعدة أعمال فنية مسرحية. تعزف زهراء على آلة الطنبورة النوبية وتهتم بالموسيقى وتأثيرها. قامت زهراء بتدريب ورش صوت في مدارس أضف في أسوان.

أحمد جمعة - رياضة

الرياضة مش بالشكل وإنما بالمخ يا جدعان، وأنا حلعب دور المخ والمعسكرين حيكونوا العضلات. الرياضة عندي غير عن التصور اللي ممكن يكون موجود، خفة دم وانبساط وتجريب، وتقولو اني حكيت.دي السنة ال ١٥ ليا في المعسكر.اتعلمت حاجات كتير من المعسكر.بنحاول في الرياضة نخلي الولاد يعبروا عن نفسهم من خلال الحركة وهما مبسوطين في جو من المرح واكتشاف قدراتهم.اللي بيحب الهدوء مش هينبسط معايا عشان أنا بحب الحركة الكتير والضحك الكتير

مصطفى حزين - مسرح

أنا تخرجت في كلية الآداب قسم المسرح شعبة التمثيل والإخراج دفعة 2004، ممثل ومخرج ومدرب ولاعب بانتومايم. بحب الشغل مع الأطفال جدًا وبشتغل فيه من 15 سنة. اشتغلت مع مؤسسات كتير وجمعيات أهلية أكتر زى الهيئة الدولية لقرى الأطفال sos ومازلت بشتغل معاهم وكمان مؤسسة تواصل واليونيسيف والأمم المتحدة وغيرها. تجربة معسكرات أضف كانت مميزة ودي تاني تجربة ليا.

نور سامي

أنا اسمي نور سامي من اسكندرية، بحب القراءة والمزيكا والخروجات مع صحابي واللعب مع قطتي. في وقتي الفاضي بحب اشترك في اعمال تطوعية و بروح ورش فنية و بحاول استكشف حاجات جديدة اطور نفسي بيها واتعرف على ناس جديدة. شاركت في معسكرات أضف في ٢٠١٩ و ٢٠٢٢ اللي علموني حاجات كتيييير و قابلت ناس مختلفين في التفكير و الشخصية و الجنسية. معسكرات أضف من أقرب التجارب لقلبي اللي حقيقي ممتنة اني كنت جزء منها وشايفة ان روّاد الأسر كانوا جزء كبير في توصيل التجربة دي بنشاطهم و حماسهم و بمساعدتهم في أي حاجة حتى لو كانت بسيطة. حابة اني اكون رائدة عشان أساعد المعسكرين و أوجههم أول أيام المعسكر لحد ما يرتاحوا للمكان ويبقى مألوف ليهم، وبعد كدة أساعدهم يبدعوا في أنشطة المعسكر والمشاريع. و كمان عايزة أخوض تجربة معسكرات أضف من منظور مختلف و فيه مسؤولية أكبر :)

عباس شمس

اسمي عباس شمص من بوداي بعلبك ، طالب معهد متخصص في الالكترونيك ، احب الرياضة والدراجات النارية ، شاركت بالعديد من الورش مع مكتبة شاهربان في بوداي تعلمت من خلالها العديد من المهارات والحرف منها صناعة الورق من مخلفات النباتات وصناعة الخيط ومواد البناء الطبيعية ، اهتم بالزراعة ايضا حيث اخوض انا وابن عمتي اول تجربة زراعية السنة وانشالله خير

إسلام نوح

أنا إسلام أحمد شاركت في معسكرات 2017,2018,2019 و رجعت تاني و شاركت كرائد أسره في 2022 و دائماً الاسبوعين دول بيبقوا أهم وقت في السنه بالنسبالي بالرغم من إني كنت خايف و قلقان منها في الأول بس بجد تجربة أضف تعتبر من أهم التجارب في حياتي كلها اتعلمت فيها حاجات كتير أوي و كشفتلي عن حاجات اكتر جوايا ماكنتش أعرف عنها حاجه و متحمس إني أرجع و أجرب و العب و اكتشف من تاني في 2023

يوسف جمال

انا يوسف جمال عندي ١٨ سنة حاليا طالب سنوية عامة و بخلص الحمدالله خلاص. حاولت اشتغل في 2022 بجانب الدراسة بس معرفتش بسبب ان مكنش في وقت كافي و في 2019 اتعلمت برمجة جافا و مهتم جدا بالتكنولوجيا عمتا بالذات الAI مجال كبير جدا و مستني اخلص ثانوي عشان ادرس و ابتدي اتعمق اكتر في المجال ده. كنت كامبر في المعسكرات الصيفية في ٢٠١٩ و كانت واحدة من التجارب الاهم و الاحلى في الفترة الي فاتت و كنت رائد اسرة في معسكرات ٢٠٢٢ و كانت تجربة مميزة و استفدت منها كثير جدا. رائد الاسرة لازم يكون متحمل للمسؤلية و يكون هو اقرب حد للمعسكرين لإعطائهم التجربة المميزة الكاملة و يساعدهم في اكتشاف مواهبهم و اندماجهم مع المعسكرين و انشاء علاقات قوية مبينهم و يبقوا عايزين يكرروا التجربة الفريدة من نوعها مرة تانية ،و لازم فوق كل ده انه يكون منضبط و متحمل مسؤلية الفرصة ديه متحمل للضغوط الي دايما موجودة بس بتكون هي بردو العامل الأساسي في نجاح المعسكر و القرب من المعسكرين.

زينة ماضي

مرحبا، اسمي زينة وعمري ١٨ سنة من فلسطين. شاركت بمعسكرات أضف في لبنان سنة ٢٠١٧ وكمان مرة في مصر سنة ٢٠١٩. أنا كتير بحب الرياضة والموسيقى والتعرف على الناس. الموسيقى جزء كبير من حياتي، وكل الوقت بسمع الأغاني وكمان بعزف آلتين الفيولين والفيولا. أنا شخص فضولي وبحب أكتشف وأجرب أشياء جديدة وكتير متحمسة أتعرف عليكم وأتعلم عن اهتماماتكم. كرائدة أسرة بحب تقدروا تحطوا ثقتكم فيي وتعطوني المجال اني أساعدكم وأخليكم تمروا بتجربة تغير حياتكم للأففضل زي ما أضف غير حياتي.

فاطمه عيد

انا فاطمه عيد بحب اجرب حاجات مختلفه وجديده وبحب الاوان والسفر والقطط و متحمسه أوي أن هشارك مع معسكرات أضف السنه دي وان هساعد المعسكرين في اكتشاف نفسهم والهوايات الي بيحبوها ونقضي الاوقات الحلوة كلها سوا

رأفت بيومي - مدير المعسكر

قد إيه جميل أن يكون عندك عيلة كل سنة بتكبر وأنت بتكبر بينهم ومعاهم وبتشوفهم وهما معسكرين وبيكبروا و يكونوا جزء من فريق المدربين والإدارة اللي كان في يوم من الأيام مسئول عنهم. من ٢٠١٣ وأنا واحد من عيلة أضف و دربت رقص معاصر في المعسكرات من ٢٠١٣ ل ٢٠١٨ وفي ٢٠١٩ انا كنت مدير للمعسكر. كل سنة المشاركين يفتحولي عيني أكثر على تفاصيل مختلفة في الحياة. التجربة دي من أكثر التجارب اللي غيرت لي حياتي وبستناها كل سنة بحماس كبير بتعلم منهم وبحاول أنقل لهم خبرة أنا إكتسبتها على مدار السنين اللي فاتت ، أنا بشكل عام بحب التدريب والشغل مع الأعمار المختلفة وبحب السفر واللعب والإستكشاف. السنة دي أنا مدير المعسكر للسنة التانية. حاصل على ليسانس آداب فنون مسرحية 2005 ,، شاركت بالعديد من الأعمال الفنية سينما وتليفزيون. وشاركت بعديد من العروض المسرحية في أوروبا والوطن العربي، بالتوازي مع عملي كمدرب رقص وتمثيل للأطفال وللشباب .

كارولين كمال - نائبة مدير

اسمي كارولين كمال عندي مؤسسة صغيرة اسمها فن وحياة في اسكندرية بشتغل مع اطفال والشباب في مختلف الأعمار ومن اماكن مختلفة، لكن اخر ١٢ سنة مركزة مع الفتية والفتيات بمختلف الفئات العمرية اني أساعدهم يقدروا يعبروا عن أحلامهم وأفكارهم من خلال خلال تنظيم ورش مسرح ورقص وسينما و إيقاع و فنون يدوية وسيرك ..

كمان بحب الكتابة الادبية و كتابة السيناريو ، شاركت في كتابة مسرحيات كتير، وأفلام قصيرة كانوا المشاركين هما اللي بيخرجوها .متحمسة لتجربة المعسكر اللي هانعيش فيها تجارب كتير على مستوي تكوين صداقات جديدة واكتشاف حاجات جديدة عن نفسي و عن الحياة. بحب السفر جدااااااا واللعب اكثر حاجه بلاقي نفسي فيها .. انا جاية العب معاكم.

أمينة علّام - مسئولة العمليات ومسئولة الرواد

سامووو عليكوووو !!!!!!!!!!!!!!! أنا اسمى أمينة علام من مصر،خلصت دراسة صناعة سينما في لندن. بروح المعسكر من وأنا عندي 12 سنة، دي السنة 12 ليا في المعسكر .من معسكرة إلى ادارجية، سنين من التحدي والشغل الجامد و قلة نوم و جري وناس كتير من بلاد مختلفة وصحيان بدري . بستنى المعسكر من السنة للسنة. فهمت نفسى أكتر و اكتشفت الحاجات اللي بحبها و إيه المجالات اللي ممكن اشتغل فيها طبعا في المعسكر .أهم حاجة طلعت بيها من المعسكرات هى عيلتنا الكبيرة و أجدع صحاب هيكملوا معايا بقية عمري.

زينة عرفة - منسقة المعسكر

أسمى زينة و متخرجة من كلية الاقتصاد و العلوم السياسية وبعشق حاجة اسمها معسكرات لأنها بالنسبالى الطريقة الوحيدة البتخلينى افصل تماما عن الحياة التقليدية و مادياتها فبرجع لفطرتى و طبيعتى و كمان بكتشف نفسى و مهاراتى اكتر (مهارات التواصل، الحركه، حثى الفنى .....) و بعيش كل لحظه فى وقتها و كل ده من خلال تجربتي مع المعسكرات من و انا طفلة فبالتالى أنا حاليا مؤمنة بأهمية المعسكرات فى بناء شخصية الفتية الهى اهم من المدارس بالنسبالى فعشان كده أنا موجوده هنا عشان نطور من شخصيتهم و نبسطهم و نبقى صحابهم كمان.

ريم الشربيني - دكتورة المعسكر

انا مبسوطة و متحمسة جداً جداً اني هكون جزء من المعسكر السنادي و لأول مرة ليا ، انا متخرجة من طب من ٣ سنين و اشتغلت كزا تخصص لكن حبيت جداً التعامل مع الاطفال و المراهقين و ده خلاني ارسى على اطفال، كنت دايماً بحب اشارك في اعمال خيرية و حاجات برا عن الطب، و ده الي جابلي الفرصة دي . متأكدة انها هتكون تحربة مميزة جداً و اتمنى اكون جزء من العيلة دي كل سنة

محمد مجدي - مسئول تقني المعسكر

أسمى محمد مجدى بشارك فى معسكرات الفتية كمدرب صناع من 2018 حتي الأن , بس السنة دي هكون المسئول التقني للمعسكر. مهتم بالتقنية خصوصا الالكترونيات والبرمجة وازاي ممكن ندمج الفنون بالتقنية , ومهتم بالكتابة فى المواضيع التقنية زي ازاي ممكن يكون الفضاء السيبراني مساحة امنة و وازاي نحمي نفسنا